Entrevista a Mariu Arbesú, militante d’Andecha Astur.

InfoAsturies.net asoleya güei una entrevista a Mariu Arbesú, militante d’Andecha Astur que foi&nbsp cabezaleru de les llistes a les elleiciones europées.

La entrevista céntrase na propuesta de campaña SOS Asturies afitada&nbsp na xunidá d’aición, que ficiera en campaña. La situación de la campaña, en que consiste, les espectatives y la prosimidá del 8 setiembre, Día de la Nación Asturiana, son dalgunos de los asuntos qu’Arbesú respuende na entrevista nesti mediu dixital asturianu.

Entevista n’InfoAsturies

Na campaña ellectoral prometisti que dempués de les elleiciones, fueren los que fueren los resultaos, dibes plantegar una propuesta de “xunidá d’aición” alredor del llema “SOS Asturies”.&nbsp Entovía nun hai nada público. ¿Qué pasó dende entós?&nbsp

Ye cierto que nun hai nada público pero, sin que lo ficieremos público, sí qu’hebio bastante movimientu. Concretamente foi nel actu políticu del&nbsp Día d’Andecha en Ribeseya onde plantegué por primera vez la idea.&nbsp Dixe espresamente que si n’Andecha lo teniemos claro intentaríamos facela lo mas abierta posible y llevala a aquellos seutores de la sociedá que tan fartos de les carencies democrátiques y de la crís permanente na que vive Asturies. La propuesta d’aquella taba mui verde: cenciellamente proponía, dientru la nuesa táutica de xunidá d’aición, una campaña baxo’l llema &nbsp SOS Asturies. Dende entós a esta parte fuimos aldericando sobre’l tema pero nun sólo dientru d’Andecha Astur sinon que quiximos sacar l’alderique a fuera tamién. Presisamente un de los primeros pasos que dí dempués de les elleiciones foi falar d’esto con bastante xente que nun ye d’Andecha pero que venimos moviendonos o coincidiendo muncho casi siempres nos mesmos espacios.&nbsp Posteriormente de forma yá formal treslladámosla a les organizaciones. Fae ya de esto algo menos d’un mes.

Vamos empincipiar polo primero, ¿Qué ye eso de la xunidá d’aición? ¿En que consiste la propuesta y a quién va dirixida?

Trátase de crear un espaciu de coincidencia pa trabayar a comuña con aquellos qu’asuman esta táutica ensin más condicionante que’l compartir esta necesidá de trabayu xunitariu en defensa de los drechos presonales y colleutivos del Pueblu Asturianu. Una de les primeres coses que tamos plantegando ye qu’esi espaciu sirva pa mantener una comunicación permanente, intercambiu d’información y alderique ente les organizaciones asina como organizar y coordinar aiciones o campañes comunes.

Daquién podría pensar, viendo’l funcionamientu de la política institucional ya institucionalista, que se quier facer dalgún tipu de coalición ellectoral o que respuende a estratexes ellectoralistes. ¿Ye asina?

Non. N’absolutu. Una de les coses que precisamente facilita más el que esta idea puea salir bien ye que nesti intre nun hai unes elleiciones a la vista. Sería radicalmente irreal plantegar nesti momentu una xuntanza elleutoral o daqué asemeyao. Lo que nós plantegamos ye entamar la casa polos cimientos. Xenerar un espaciu que permita dir conociendonos, ver cuales son les coincidencies y cuales les diferencies y a partir de les coses nes que coincidimos crear espacios de llucha y trabayu en comun pero partiendo siempres de la soberanía de les organizaciones y persones que quieran tirar por ello.&nbsp La idea ye que les organizaciones continuen igualmente cola so actividá y la so dinamica propia y que dende esti espaciu se respete dafechu la so propia percepción de la rialidá y los sos analís políticos.

Vemos que nun ye dalgo zarrao y onde se respeta dafechu l’autonomía y soberanía d’organizaciones y persones. Si hai sectores que nun ven clara la iniciativa agora, ¿van poder amestase más alantre?&nbsp

Sí, esi ye otru aspectu interesante de la propuesta d’Andecha Astur. Ye abierta y pretende ser un procesu llargu nel tiempu nel que habrá que dir incorporando a más sectores sociales, políticos, sindicales&nbsp a esta táutica y concretamente a la campaña de SOS ASTURIES. Eso sí,&nbsp entendiendo que, lloxicamente la propuesta ta dafechamente pesllada a aquelles presones y partíos políticos responsables d’esta situación como FSA-PSOE y IU-LV-BA.

Y.. ¿onde ta’l puntu d’aniciu?, ¿cómo se quier echar a andar esti marcu de xunidá d’aición?

La idea ye entamar con una campaña llarga nel tiempu baxo’l llema SOS Asturies. Ye un lema que podemos compartir toos y que habría que dotalu d’unos contenidos de denuncia. Concretamente nosotros pensamos n’articular la campaña baxo esi lema denunciando dos cuestiones: les carencies democratiques y la falta de drechos políticos que carecemos n’Asturies asina como la crisis permanente a la que nos somete la política económica colonial del estáu español pa col nuesu país. &nbsp Ye dicir: dos o tres puntos de fondu políticu y un lema o llogotipu qu’identifique la campaña y que sería SOS Asturies. Sería una campaña ambiciosa quiciabes como nunca se vió n’Asturies.

Ta ehí l’ochu setiembre, el Día de la Nación Asturiana ¿pué haber novedaes esti añu?

Sí. Nós tresllademos a les organizaciones una propuesta el 9 d’agostu concretamente que consistía en entamar el 8 de setiembre con la campaña de SOS Asturies cellebrando un Manifestamientu conxuntu con motivu del Díi de la Nación Asturiana, baxo’l mencionáu lema, con baberu compartíu, convocatoria individual (de forma que ca muerganización puea da-y el matiz que camiente más afayaizu, dientru’l lema xeneral) y con comunicáu final conxuntu, en función de los alcuerdos que s’algamen.

Bono, &nbsp entós paez que dalgo pue salir…

Sí. Esa ye la idea. Tamos viendo que nun toes les que mos prestaría. Agostu son siempres feches difíciles pa sacar alantre proyeutos d’esti tipu y eso ta repercutiendo bastante no despacio que va too. Hai espectatives de qu’esta selmana se concrete alguna cosa de cara al 8 de setiembre con algunes organizaciones. Vemos que dende los seutores más independentistes asumese mui bien la llinia que proponemos y dende les organizaciones mas tradicionales d’izquierda tamién. Ente muerganizaciones como Darréu, CSI o Pcpe además de otros coleutivos sociales y políticos la acoyida foi mui bona dientru, lloxicamente, de les dificultaes esperables. Por embargu, parezme que costará más implicar a los sectores del nacionalismu más moderáu. Por exemplu’l PAS y la UNA dempués de más de 15 dies cola propuesta sobre la mesa entá nun mos contestaron. En tou casu, sabemos que estes coses requieren paciencia y nós siguiremos esforzándonos nesti apueste xunitariu incorporando a esta táutica a más sectores políticos, sindicales, sociales, culturales, ecoloxistes…

NOTICIAS ANTICAPITALISTAS