Acción de mias>> contra la simbología franquista.

28/11/2006 >> La organización política xuvenil Mocedá d'Izquierda Asturiana cellebró na tarde del vienres 24 de payares un actu énte la estatua de Teijeiro n'Uviéu. L'aición reivindicativa centróse en trés aspeutos fundamentales. En primer llugar procedióse a facer un embalaxesimbólicu de la estatua de Teijeiro col que se quixo espeyar el deséu de la retirada de los monumentos y señales del réxime que dirixere Franco.

Durante l'actu, miembros de mias>> espardieron ente les y los presentes dellos exemplares de la so «Guía Antifascista d'Uviéu«, un documentu nel que se recueyen una bona parte de los elementos que la organización propón retirar, desplicando amás del so asitiamientu, el so  significáu y los sos principales protagonistes, al tiempu que se fai una contestualización histórica de caún d'ellos.

Pa finar, lleóse un manifiestu pola retirada de la simboloxía franquista, documentu nel que se recueyen les principales reflexones al rodiu d'esti tema de la propia organización:

“Alcontrámonos nunes feches nes que toca recordar la muerte del home qu’encabezó un réxime que caltuvo esti llugar del mundu durante 40 años baxo una dictadura que tornó la llibertá de desendolcu social, cultural y económicu propiu, una dictadura que traxo la represión, el desaniciu de los derechos individuales y colectivos y l'intentu de destrucción de cualquier identidá y noción concebida por aquellos fascistes como “diferente” a la de so.

Precisamente, paez qu’a lo cabero los tiempos venimos careciendo d’un nuevu surdimientu de movimientos fascistes, qu'ente otres munches repudiables aiciones, vindiquen los fechos y los restos d'esi tiempu tan murniu p'Asturies y pal restu l’Estáu, y qu'inda son bien visibles anguaño nes nueses cais.

Al mesmu tiempu, viense notando un mayor esmolecimientu dende dellos sectores de la sociedá por recuperar la dignidá del bandu perdedor n'aquel 1939 y honrar la memoria de los millones de persones que vieron dende entós p’acá tapecida la so hestoria. Esta llucha pola 'memoria hestórica' de la que tanto se fala güei conlleva necesariamente la retirada de monumentos, plaques y otres parafernalies que siguen nel llugar o­nde se punxeron va décades, que siguen rindiendo homenaxe a aquellos que derrocaron poles armes un réxime lexítimu, dexando millones de calabres pel camín, somorguiándonos na solombra ya imponiéndonos l'escaezu.

Énte esta situación, Mocedá d'Izquierda Asturiana quier sumase a la llucha y desixir la retirada d'esta simboloxía de les cais pa finar con esti llamentable tributu que los culpables del horror fixéronse a sí mesmos, pero que trenta años depués sigue tando más que presente, ofendiendo a tolos afectaos directa o indirectamente poles llaceries del franquismu, ofendiendo a cualesquier persona que nagüe por un mundu nel que lo soberano seya la pallabra y la tolerancia, l’alcuerdu, el respetu, la solidariedá.

En mias>> creyemos que la retirada d'esta simboloxía ye inescusable y que l'únicu llugar afayadizu pa estos oxetos ye un muséu de la memoria hestórica o­nde se faiga'l xustu y más rigurosu recuerdu de los fechos d'esa dómina, finando col ensalzamientu de quien fixeron un dañu tan grande. Gran parte d'esi dañu ye irreparable, pero precisamente por ello y siendo conscientes de la fondura de la firida, equí y güei queremos facer por recuperar la hestoria que’l franquismu quixo remanar y esborrar, esborrando al empar la dignidá de la xente que lluchó por caltener el determín popular de les urnes. Namás l’amnesia puede llevanos a repitir episodios tán llamentables, y ye por eso que tien llugar esti exerciciu d’alcordanza de lo más triste de la nuesa hestoria recién.

Ye hora de poner les coses nel so sitiu, de facer xusticia social volviéndonos la dignidá hestórica que quixeron -y qu’anguaño entá della xente quier- quitanos, una xusticia social que ye la única  ferramienta útil pa construyir una sociedá igualitaria que nun caya enxamás nos mesmos errores”.

Estaya de Comunicación de mias>>
Uviéu, a 26 de payares de 2006

Mocedá d'Izquierda Asturiana>>

NOTICIAS ANTICAPITALISTAS