“A Garda Civil dinos que non denunciemos a Mario Conde”

A.D.C., natural do Barco, asegurou antes de entrar ao cuartel que “estamos dispostos a demandar a ese señor, pois temos moitas testemuñas”. Ademais das agresións, o obxecto da denuncia estaría motivada tamén porque o mozo asegura que Conde lle chamou “negro, xusto antes de que me agarrara polo pescozo”

Porén, finalmente non houbo denuncia. Desde a familia explicaron que “saímos sen denunciar, pois no cuartel dixéronnos que non nos meteramos en barullos e que levabamos as de perder”. Asemade, aseguran ter medo “pois un axente da benemérita é amigo de Mario Conde e onte estaba presente cando aconteceu a agresión, de feito, foi o que separou ao neno de Conde”

No cuartel da Garda Civil do Barco desmenten estas declaracións e aseguran que non tramitaron a denuncia porque “ninguén dos que acudía viña identificado”. Pero aproveitaron para recriminar a quen asina esta información para que borrase as fotos sacadas diante do cuartel ademais de o obrigar a se identificar.

Sen resposta desde o partido de Conde

Sermos Galiza contactou con Francisco Tarrío, cabeza de lista por A Coruña e Xefe de Candidaturas de Sociedad Civil y Democracia –o partido que preside Mario Conde, para consultalo a cerca dos altercados ao remate do mitin do Barco. Tarrío respondeu que “nin sabía que houbera mitin no Barco, este partido está moi desorganizado”.

A desorganización é patente, pois ningún cargo orgánico de Sociedad Civil y Democracia foi quen de facer declaracións a respecto da polémica que fixo pública este xornal. A coordinadora de campaña, María Jamardo, ao ser consultada, asegura nun primeiro momento que “a xente do partido tratou de falar co rapaz, pois estaba insultando a Mario Conde”, mais tras varias preguntas remata por asegurar que “todo é rotundamente falso e á saída do mitin do Barco non pasou nada do que publica Sermos Galiza”.

http://www.sermosgaliza.com/artigo/eleccions2012/-a-garda-civil-dinos-que-non-denunciemos-a-mario-conde/20121012212417006265.html

NOTICIAS ANTICAPITALISTAS